ОРОЛЦООТ ЭПИДЕМИОЛОГИЙН ГАРЫН АВЛАГА МОНГОЛ ХЭЛ ДЭЭР ГАРЛАА

Дэлхийн зөн Монгол олон улсын байгууллагатай 2024 оны хамтын ажиллагааны төлөвлөгөөнд тусгагдсаны дагуу Оролцоот эпидемиологийн гарын авлагыг монгол хэл дээр боловсруулж бэлтгэн гаргалаа.

Энэхүү гарын авлагыг Мал эмнэлгийн нэгдсэн системийн холбогдох талбарт цахимаар байршуулах бол төслийн зорилтот аймгуудад хэвлэмэл байдлаар хүргэхээр ажиллаж байна.

Орчин цагт малын эрүүл мэндийг хамгаалахад хэрэгжүүлж буй хөтөлбөр болон стратеги нь өвчин гарсан үед оношилж, эмчлэхээс илүүтэйгээр өвчин үүсгэх эрсдэл, шалтгаан нөхцөл болон сүргийн дундах далд халдварыг эрт илрүүлэх, урьдчилан сэргийлэх арга хэмжээг тогтмол, чанартай зохион байгуулахад чиглэж байна.

Иймд урьдчилан сэргийлэх арга хэмжээний зардлыг өвчин гарч, тархсан үеийнхтэй харьцуулахад хариу арга хэмжээ, цаг хугацаа, нөөцийн хуваарилалт зэрэг нь хэд дахин үр ашигтай байдаг.

Мал эмнэлгийн салбарт идэвхтэй, эрсдэлд суурилсан, эмнэл зүйн хам шинжийн тандалт буюу оролцоот эпидемиологийн аргачлал чухал байгааг манай улсад ажилласан олон улсын экспертүүд удаа дараа зөвлөсөн.

Мал сүрэг эрүүл байх нь ганц малын эмчийн ажил бус, оролцогч бүх талын асуудал бөгөөд малын эрүүл мэндийн талаарх малчдын мэдлэг ойлголт, хандлагыг судлах, өвчин гэхээс илүүтэй эмнэл зүйн хам шинжийг ашиглан өвчнийг эрт илрүүлэхэд оролцоот эпидемиологийн арга зүй дэмжлэг үзүүлэх юм.

“Оролцоот эпидемиологи, оролцоот тандалтын чадавхыг бэхжүүлэх” хөтөлбөрийг Мерси Кор болон Дэлхийн Зөн олон улсын байгууллагуудын төслийн хүрээнд 2018 оноос хойш 9 аймаг (Ховд, Баян-Өлгий, Хэнтий, Сүхбаатар, Увс, Говь-Алтай, Дорноговь, Дундговь, Дорнод)-т үе шаттайгаар хэрэгжүүлж байна.

Төслийн хүрээнд 2024 оны байдлаар мастер сургагч 1, үндэсний болон орон нутгийн түвшинд сургагч багш 6, төслийн зорилтот аймгуудад 89 хэрэгжүүлэгч эмч бэлтгэлээ. Эдгээр бэлтгэгдсэн мэргэжилтнүүдээр дамжуулан орон нутагт малын өвчнийг эрт илрүүлэх тандалт судалгааг хийх, мал эмнэлгийн мэргэжилтнүүдийг чадавхжуулах, оролцоот эпидемиологийн судалгааны үр дүнг төлөвлөлтөд ашиглах ажлууд цаашид ч үргэлжлэх юм.